January 9, 2013
-
My Movie of the Year 2012 (上)
電影回顧寫左成個幾星期，愈寫愈長。決定分開上下集，先講下今年統計和票房十大。沒興趣看統計的可以直接跳過這部分，等下集。（下集寫左一半左右……）
先來一些統計＆票房十大
今年入戲院看戲數目再突破，共75套（+9）！連續18周進場（+5）！哈哈，今年我是用了點狠勁，電影節的動畫全睇、收工睇戲、擠時間睇戲，深怕以後沒這麼多自由時間，一個人在戲院裡自我陶醉。（是的，我最喜歡一個人看電影。有什麼好驚訝？下次我跟你說我一個人去看電影，請不要露出訝異的表情喇。）
75套戲之多，好像什麼戲都看過，其實不然，因為當中有26套是電影節的冷門片和動畫。去年說要多看港產片，結果看了11套，多左1套咁大把！最多的是西片，28套；動畫，24套；日本片也看了8套！3D電影成了主流，套套大片都要做3D，今年看了9套3D電影。雖然我的原則是可免則免，不過有些戲還是要看3D才過癮，例如年初的《龍門飛甲》，徐克美術的確很出色。（還好我看3D不會暈，我是看hand-held會嘔。）
看看十大票房。港片十大票房竟然看了8套！11套中左8套！命中率72%！大家以後看港產片可以先問我意見！哈哈～每套又講兩句啦。
- 《寒戰》：新導演黎講，拍出呢個水平，有咁既票房，係超額完成！查出背後大佬個段幾緊湊，但我唔明點解有人話睇唔明。另外，如果話「慶幸今日我們還有一套《寒戰》」，咁，不論係電影界，或是政治局面黎講，都係一件幾悲哀的事。
- 《低俗喜劇》：話題電影。但以彭導的水平，合格而已。話分兩頭，非合拍片加純本土題材，一定要入場支持。
- 《春嬌與志明》：又係話題電影，而且係一個講左好很耐既話題。揀春嬌定尚優優，係個期我見男人就問既問題。據我同我班同事的非正式統計，高達八成人會揀尚優優。揀邊個都好，各有原因，問黎純粹玩下。但我動了真氣地嬲，春嬌無可能揀返張志明個仆街！！春嬌姐，你自己講嫁，都唔work，明知唔work都仲要舂個頭返去？！
- 《逆戰》：我覺得故事好老土。爆炸大場面幾好睇。吳浩康個角色被人打到樣都認唔到，好慘。（係呀，我係幾鍾意佢的。）
- 《一路向西》：又係話題電影。以高登絲打心態去睇，好好笑；以香港人心態去睇，抽水位睇到有點心up；以咸片角度去睇……問男人啦，我點知遮～
- 《大追捕》：當時覺得OK，上映時也有noise。但到年底，《大追捕》係我次次都數漏的－－存在感好低。Janice Man係戲入面好靚！演技都有進步！有少少驚為天人感，一改之前的MK feel，希望佢繼續努力啦。
- 《車手》：飛車片黎講，佢好少飛車。車款又舊。不過對於我呢ｄ唔識車的人，「八千轉兩咪車」係幾新穎的東西。
- 《2012我愛HK喜上加囍》：屌，比起無記早兩年的賀歲片《72家租客》、《我愛HK開心萬歲》差好很多！！（因為唔係黃洋達編劇？）
外語片十大反而（28之中）得5套，或是說，我看的外語片比較冷門和雜喇：
- 《復仇者聯盟》THE AVENGERS 3D：期望了年多，只係勉強收貨。（hero迷如我，只係見到班hero同我女神出黎行行企企已經收貨……）但最令我不爽是最後打大佬一段，咦？點解同《Transformers 3》咁似樣既？
- 《蝙蝠俠：夜神起義》THE DARK KNIGHT RISES：講真，第二集好睇ｄ。不過，呢集都ｏｋ的。嗯，但係最後Joseph攞返個行李時，話自己有第個名叫Robin。天呀？！駛唔駛講埋出黎呀？！
- 《蜘蛛俠：驚世現新》THE AMAZING SPIDER-MAN：Reboot黎講，我覺得唔拍好過拍。
- 《黑超特警組3》MEN IN BLACK 3：琳瑯滿目的奇怪造型外星人係MIB的賣點，今集太少外星人喇！故事最後講返K同J的淵源，我覺得好感動……BTW，有Andy Warhol，超驚喜！
- 《新鐵金剛:智破天凶城》SKYFALL：Daniel Craig飾演的007係他媽的有型。今集比上集《量子殺機》係好左，但依然唔夠第一集咁好。中間澳門情節散散收收無無謂謂。如果話係要回歸基本，講返007身世，咁都可以既。最好笑的，睇完之後我話：「今集的邦女郎係Q？」哈哈哈～～～
補充一下，聖誕檔前，《賤熊30》排第10，我也有看的。不過聖誕檔後第10位就給《哈比人》追上了。（資料來源：2012年港產片及外語片十大票房）
今年有一件小遺憾，就是電影節筆記爛尾了。3月電影節寫了頭幾篇，之後一直在忙，沒時間寫了。其實圖我都做好了，草稿也寫好，但就是沒時間整理。2013年再挑戰！
下集會真正講我今年睇左個75套戲入面最喜歡的！
