今年的電影節筆記二月底就開始了。往年第一炮都是ifva，今年發現「第二屆香港國際聾人電影節」其中有一個動畫節目，我當然不會錯過喇！好吧！2012年的電影節筆記，開始了！

第二屆香港國際聾人電影節
節目四：動感魅力
Programme 4: Animated Visions –– A Showcase of Animation Made by Deaf Artists
25/02/2012 10:30pm @ agnes b cinema

十條短片，嚴格來說，部分算不上動畫。雖然如此，當中不乏佳作，只是總合起來質素有點參差。其中有三個作品值得一講。（按片名看原片或Trailer。）

饕之慾：來自台灣的作品。以真人片段為背景，再加上2D的動畫人物，易做，又有趣。其中4:20，燈泡變成太陽一幕，係低成本的製作之中，有如神來之筆，是很出色的過場。鏡頭運用很有意識，穿插使用的主觀鏡令短片多點不同角度和元素。

Sipho：這是南非世界聾人大會的卡通動畫。我十分佩服以不同顏色的手併成樹和地球的創意。獅子Sipho也造得很好，毛髮有層次，表情有真人神髓，最重要是能夠很完善地做到手語。

追逐棉花雲Chasing Cotton Clouds：故事非常完整，而且感人。講述與姐姐相依為命的失聰男生，在自己製作的模型之中，懷念已經過身的爸爸，與接受世界。當中動畫部分不算多，是主角幻想走進模型世界裡探望爸爸，當中的棉花雲、摺紙動物，全都是Stop-motion（0:47）。

進場前，心裡很疑惑：什麼是聾人電影？沒有聲音的默片？或是畫面一角會有手語旁述？官方簡介沒有回答我的問題，但大概也解釋了：由聾人主導或參與製作，關心聾人文化，以電影這個媒介傳遞訊息的藝術。看完十條短片，我發現，聾人電影並不是我幻想的那樣，要有「特別設計以照顧部分人士的需要」。反之，它如我接觸過的許多電影作品，一樣在藝術上有所追求，在內容上言之有物，關心人文文化。如果我以「特別需要」的眼光待之，那就是視他們和我不一樣，把它看成怪物了。

延伸：
第二屆香港國際聾人電影節官方節目簡介

上星期夾情人節做合唱歌special，錯過左Grammy Award。今年Grammy一開始就係Bruno Mars同Adele之爭。大家都係個６個提名，決戰意味好重！最終Adele一手掃晒６個獎！好勁！（星期一、二聽完Grammy，另外三日既選歌就無主題～隨意選的～）

20/02/2012 MON
Bruno Mars - Grenade

Bruno Mars好慘，六個提名，一個獎都無，仲要六個都係輸比Adele。今日就聽下佢呢首落選Song of the Year同Record of the Year既Grenade。輸比Adele，差個馬鼻。Pop加R&B的Grenade絕對唔差，個人覺得，可能係音樂本身未至於歌詞描寫咁慘，有點落差唔夠統一。其實Bruno Mars既演繹幫左好多，尤其係佢聲線上微微地「練」住個種質感，非常配合首歌「有苦自己知」的慘情。

21/02/2012 TUE
Adele - Rolling In The Deep

天生歌姬－－我會用呢四個字形容Adele。名副其實的巨肺靚聲。Adele聲底之厚，請容我在這裡向Whitney Houston和Amy Winehouse致敬地說：她倆離去，R&B/Soul界還有一名新星Adele。再講英美流行，你識Rihanna、Katy Perry、Lady GaGa、Taylor Swift，下一個你一定要識的，一定係Adele，佢真係好紅好紅！呢首Rolling In The Deep係今屆Grammy，狂風掃落葉地掃左六個獎成為大贏家！（我麻麻R&B/Soul都一聽愛上！）
忽發奇想，好想聽下林欣彤／GEM唱Rolling In The Deep！唔知效果如何？

22/02/2012 WED
范曉萱 - 氧氣（有氧版）

唔知大家仲記唔記得，范曉萱呢首〈氧氣〉，一詞兩曲，分「缺氧版」同「有氧版」，前者係主打。當年第一次係電台一口氣聽到同一個詞有兩個完全唔同的曲，一慢一快，覺得好勁！「缺氧版」chorus第一句「如果你愛我，你會，來，找我」確是比較動人，呢種曲式、編曲，好穩陣，係范曉萱拿手的，同佢另一首〈雪人〉有點似。兩個版本都好聽，不過我個人更喜歡「有氧版」，有點時代感，覺得比較襟聽。編曲亦都較豐富，多點層次，尤其個前奏，好有水底feel。
范曉萱 - 氧氣（缺氧版）：http://youtu.be/5E_4hLBe-M8

23/02/2012 THU
Asian Kung-Fu Generation - 或る街の群青（某個小鎮的深藍色）

一如one band one day的細孖匡形容，亞細亞功夫世代「幹勁、精密、盡情，同時無奈無力」。〈或る街の群青〉出自動畫《惡童》，一部講手足情和城市變化的動畫。可能係受劇情影響，聽著聽著，就想起小時候像街童那樣通山跑、爬繩網、踩單車、跌穿頭。特別是前奏和收結的結他，有種懷舊而無奈的情懷，令人想起童年。（首歌由0:50開始，前面係動畫片頭。《惡童》改編自松本大洋的同名漫畫，一開始第一把聲係二宮和也、0:31第二把聲係蒼井優，佢地兩個為《惡童》的主角小黑、小白配音。）
細孖匡話聽Asian Kung-Fu Generation，好讓自己「在筋歇力疲的日子延續生命」；不知是我悲觀或主觀，佢地的無力感往往令我不知所措，不知如何重新振作。

24/02/2012 FRI
Katy Perry - Last Friday Night (T.G.I.F.)

TGIF！好多個星期五想揀Last Friday Night了，排到今日終於出到了～呢首好玩開心講Party既歌，最抵死係，1:49，出場啦！！Friday既Rebecca Black！！Katy Perry係自己又係講Friday既歌搵Rebecca Black，係一個好應景既贈慶！其實我覺得更難得係Katy都係靚女一名，可以放下身段扮箍牙妹有咁醜得咁醜（當然最後又係醜小鴨變天鵝橋段），都好野嫁！佢本身都係傻大姐一名，呢類MV其實好襯佢～

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

今個星期係情人節之周，一連五日，「每日一歌」會貼五首經典合唱情歌！！而最爆既，2月16日，唐英年出黎回態僭建事件，就連「每日一歌」都要係呢事件上抽水！咁都得？！

13/02/2012 MON
蔣志光、韋綺姍 - 相逢何必曾相識

第一首係經典之中既「經典之霸」，我諗無人會唔同意喇？！本身首歌已經夠晒經典，《家有囍事》仲要係咁玩，我諗唔到近20年有邊首合唱歌經典得過佢！講開又講，首歌詞曲都係蔣志光手筆；其中「同是天涯淪落人，相逢何必曾相識」，出自白居易的《琵琶行》；另外，韋綺姍係杜麗沙堂妹@_@！
《家有囍事》周星馳 - 相逢何必曾相識（注意音量，好大聲）：http://youtu.be/0QUuk2zimys

14/02/2012 TUE
張智霖、 許秋怡 - 現代愛情故事

初哥哥呀～～～～張智霖、 許秋怡佢兩個一出道就以金童玉女情侶檔推歌，憑住呢首〈現代愛情故事〉一炮而紅，之後仲有一首〈片片楓葉情〉！睇返個MV，許秋怡個校服look，好OK喎！（痴漢出沒注意！）BTW，連續兩日兩首歌都係「飛圖」出品，KTV初初興起的年代呀～～～～真係好久遠！（當時係會買卡啦OK既VHS係屋企唱XDD）

15/02/2012 WED
林隆璇、周慧敏 - 流言

每次一講起呢首歌，好多人都會話「周慧敏首〈流言〉」，咁男聲呢？邊個唱？成日都只係記得「個名好撓口果個」……林璇隆，唔係，林隆璇先岩呀！（「林龍船」？呢個gag我都係聽返黎～） 原來近幾年佢係台灣歌唱比賽節目《超級偶像 Super Idol》做評審，我無睇開，唔講唔知。至於周慧敏，廿年如一日（首歌廿年了！），依然咁靚！

16/02/2012 THU
關正傑、雷安娜 - 人在旅途灑淚時

今日唐唐推左老婆出黎受死，「每日一歌」都要抽一抽水，送返首〈人在旅途灑淚時〉比佢兩公婆。一來match返今個星期合唱歌的主題，二來用呢首歌好有頭條新聞feel，邊句歌詞對號入座，大家可以幻想下！
歌詞：http://hk.music.yahoo.com/album-song.html?songid=11581
（講開又講，選舉呢ｄ咁黑暗既政治遊戲，實係互相抹黑，睇下邊個高手底手遮。精既，比人唱完仲可以博同情；屎既，咪好似唐唐咁囉。一早知你蠢，但宜家蠢到咁既殘局，你叫上面的大人點欽點你呀？）

17/02/2012 FRI
許志安、鄭秀文 - 其實你心裡有沒有我

許志安、鄭秀文，或者係我地呢個年紀既人最想見到開花結果的一對。由小學時睇佢地情侶檔，到當年許志安拎男歌手的「櫥房宣言」，再到宜家離離合合終於走返埋一齊，大家好似見到金童玉女有情人終成眷屬十分安慰。除左呢首，仲有〈唯獨你是不可取替〉都好經典，我揀〈其實你心裡有沒有我〉，因為好似好多人只記得前者，而較少講呢首。（而且呢個無線MV仲係劇場版！）合唱歌系列最後一首，揀sammi同許志安，我覺得佢地先代表到我呢代人係聽咩歌長大。

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

今個星期「每日一歌」無好特別的主題，星期一、二講Queen of Pop: Madonna、King of Pop: Michael Jackson。星期三、四就介紹兩隊好有名的法國電子組合，Air同Daft Punk。佢地差唔多時間成名，但風格好唔同。

06/02/2012 MON
Madonna - Give Me All Your Luvin'

Queen of Pop出新碟喇～今次第一PLUG：Give Me All Your Luvin'無之前Hung Up同4 Minutes咁搶耳，但首歌好電波，係個腦入面係咁play！外國宜家好興featuring，娜姐今次就搵左M.I.A.同Nicki Minaj，好有提攜後輩的感覺。外國吹風吹左好多年：究竟邊個接到娜姐捧，做到Queen of Pop？曾經的Britney Spears被寄予厚望，可惜後來佢癲左。到之後Lady Gaga，早期好多人講話佢接左班，但事實證明，宜家的Gaga走出左佢自己既路。所以娜姐明明講過話專心拍戲唔唱歌，唔夠兩年，佢又出碟了～
（上次4 Minutes搵Justin Timberlake我唔覺係提攜嫁，一來Justin佢自己已經好紅，二來真係有火花。）

07/02/2012 TUE
Michael Jackson - Speed Demon (From Moonwalker)

講過Queen of Pop，點可以無King of Pop -  Michael Jackson！MJ太多經典，唔需要介紹喇～不過我推歌又推戲，佢套Moonwalker（中譯《外星戰將》，又一個九唔搭八既名），雖然為左就歌而變得劇情唔連貫，斷開一段段又有ｄ膠，但作為一套歌舞片，MJ演出精湛不在話下（歌舞上，不是演技上啦），加上異常出色的art direction，顏色繽紛，卡通化的演繹，連stop-motion都有！（中左我死穴喇，我好難唔鍾意～）今日呢段Speed Demon，正係出自Moonwalker喇～

08/02/2012 WED
Air - Sonic Armada (Le Voyage Dans La Lune)

來自法國的二人電子組合Air，如果我話曾經幫Sofia Coppola三套戲The Virgin Suicides、Lost in Translation、Marie Antoinette做音樂，唔知有無人會對佢地有多少少印象？今日呢首Sonic Armada同Sofia Coppola無關，但都係電影音樂：超級經典默片《月球之旅》全新修復版的配樂。不愧是法國組合，浪漫風格；音節短得像閃燈的音效，營造出科幻感跟電影的冒險主題很配；整體而言很輕很柔，絕不會開大喇叭焚機的氛圍，便構成Air充滿文藝感的優雅。
我之前寫過《月球之旅》的review：http://kimkim-or.xanga.com/757038877/

09/02/2012 THU
Daft Punk - Derezzed (Tron: Legacy)

介紹過優雅的Air，黎多隊法國的二人電子組合Daft Punk。Daft Punk同Air一聽就分得出，Daft Punk既機械感、搖滾味、disco feel都強好多。呢兩個電音怪傑，LED閃燈頭盔勁突出易認，酷炫外型又帶幾分惡搞。呢首Derezzed都係電影配樂，出自《創戰記Tron: Legacy》。（噢，我好多歌都係因為電影而識！）MV用返套戲的場景同元素，當係外傳睇都唔錯。
佢地個頭盔真係好正，好有黑武士feel～（按這裡看圖）Tron時期呢個唔夠勁，之前一金一銀，LED閃燈砌出笑笑表情，型之中還有愛！

10/02/2012 FRI
Go Go Power Ranger

聽左兩日「嘟嘟嘟嘟」電子野，我諗起一個好old school、好親切、好有童真的一節「電子配樂」！哈哈～就係美版《恐龍戰隊》既opening theme！「Go Go Power Ranger」個句既「嘟．嘟．嘟嘟．嘟．嘟！」，非常適合用來做鈴聲嫁～icq年代，我表弟就係用佢黎做incoming msg提示！套戲入面，佢地果個手錶通訊器，真係用呢個「嘟．嘟．嘟嘟．嘟．嘟！」黎做訊息提示音效！
講開又講，《恐龍戰隊》美版真係比日版好睇太多了！集歡樂、惡搞、有型於一身，奠定左我日後喜歡的電影類型！（講到懶勁，其實係自己鍾意遮～）

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

「每日一歌」昂然進入第10周～今個星期介紹我非常喜歡的Red Hot Chili Peppers，另外會講下Gothic Metal！Metal已經唔小野，再加上歌德的暗黑華麗，就好似著住一襲厚重的黑紗裙fing頭！

30/01/2012 MON
Red Hot Chili Peppers - Otherside

真心想推介Red Hot Chili Peppers，總覺得他們在香港的知名度太低，他們值得更多人識。RHCP隨著結他手John Frusciante的成長，佢地的歌愈來愈深刻內省，Californation一碟，首首都是傑作。揀左我既all time fav：Otherside。想講下首歌邊部分最突出，諗落每個位置都咁優美豐富，我完全被這種沉鬱的聲音打動了。尤其喜歡其中兩句：「I heard your voice through a photograph／Pour my life into a paper cup」，多麼詩意的歌詞。
歌詞：http://www.lyricsfreak.com/r/red+hot+chili+peppers/otherside_20114741.html
利益申報：去年每日一歌已經一口氣介紹了3首RHCP，我是他們的Big Fans。所以周國賢新出隻cover album玩Otherside，我聽到喊。周國賢版Otherside：http://youtu.be/leVMV9-iAuU

31/01/2012 TUE
Red Hot Chili Peppers - Look Around

今日再推RHCP的新歌Look Around，你會聽到截然不同的RHCP。一來結他手John Frusciante已經離隊，二來好玩既funk先係佢地正宗風格。上次講到John的成長令RHCP愈來愈內省，呢種風格亦令佢同隊band愈來愈唔夾。最後John走左，新人Josh加入。Josh手結他雖然無John的渾然天成，但一樣精緻，再加上佢識好多樂器，為RHCP帶來唔同的音色。呢首Look Around，好玩又好聽，絕對係令我對佢地重拾信心之作。

01/02/2012 WED
Nightwish - Escapist

黎個重口味既：Gothic Metal（嚴格黎講係Symphonic Metal）！Gothic Metal，除左死腔、咆哮、男女高低音對唱，更係風格上，有歌德的蒼涼深邃和重金屬的侵略，交織出戲劇化效果～Nighwish主腦Tuomas手keyboard crossover大小提琴、管樂，旋律悅耳又powerful，難怪Nighwish跑出，好容易就入左主流。呢首Escapist係後期作品，換左新主音Anette。佢把聲已經較流行易聽，聽日聽下佢地舊作，先係堅料！

02/02/2012 THU
Nightwish - Ever Dream

Nightwish第一代主音Tarja個把歌劇女聲，唔可以hea聽，一定要認真聽，好似薑汁撞奶咁，Metal同交響樂同聲樂都可以撞得咁正！三者都咁有力量，澎澎聲咁湧埋黎！所以我話「打風最好就係聽Nightwish！Nightwish簡直就係狂風暴雨中的清泉！」呢首Ever Dream，癡線嫁Tarja，Live都可以如履平地，面不改容，高音到～！（宜家新主音Anette係上唔到去嫁！）
BTW，「薑汁撞奶」咁既比喻都比我諗到，十足十黃興桂！

03/02/2012 FRI
Therion - Lemuria

再聽下用得交響樂更多既Therion。Death Metal出身的Therion，中後期已經完全成長為一隊Symphonic Metal。佢地直頭可以話係交響樂crossover Metal的先驅。唔用keyboard，直接動用古典管弦樂團、詠唱團，表現出既古典氣息比尋日既Nightwish強好多好多！今日首Lemuria，唔算好古典，但最後段長笛好好聽！其實Therion既快歌一樣好重Metal味，再加上歌劇唱腔，將佢地既「古典重金屬歌劇」特色表露無遺。

＝＝＝＝＝＝＝＝＝＝＝＝＝＝＝＝＝＝＝＝＝＝

輕輕介紹左兩隊Gothic Metal，都係Symphonic Metal，其實交響樂的應用係Gothic Metal之中唔係絕對。另外，大部分的Gothic Metal band都係來自北歐國家，我個人覺得同當地地理環境好有關係。日照短，氣氛深沉，Metal也朝暗黑系發展，除了Gothic Metal，Death Metal等暗黑Metal都係北歐大放異彩，相對美國，成功入到主流的應該只有Evanescence。其實我近兩年先開始聽Gothic Metal，仲有好多band排晒隊等聽，今次真係班門弄斧喇～

想重溫過往的「每日一歌」？按這個「1song1day」tag便OK了～請多多支持啊！

初四開工大吉！恭祝大家荷包滿滿、心情靚靚！賀年歌聽得個兩首實在唔夠喉，而且好多人仲放緊假、拜緊年，好野唔好比佢停，繼續新春喜上加喜！

26/01/2012 THU
高潮樂隊 - 萬花紅

高潮樂隊你未必識，周國賢應該識喇～高潮樂隊的核心人物係本地漫畫家林祥焜，再加周國賢隊band的Joey同Goro組成（當然仲有其他成員，不過之後好多人出出入入）。呢首〈萬花紅〉featuring周國賢，佢個句「我有好多利是錢，我要買CD過年，買周國賢買周國賢正到你癡線～」雖然hardsell，但首歌本身就係好玩抵死格～無所謂喇，過年嘛～（咁岩周生真係12月出左碟！）
歌詞：http://mojim.com/twy104889x1x10.htm

27/01/2012 FRI
LMF - 大懶堂

初五喇，如果今日開工大吉，聽日又放兩日，今日心情一定就好似呢首歌咁：「想，我都好想好似中左頭獎，有野唔駛做，老世又吹我唔漲～」過年放咁多日假，今鋪真係先甜後苦，成個二月加三月，成９個禮拜先放復活節假呀！講開又講，〈大懶堂〉絕對係LMF的superhit，打入主流不特止，成功在唱出了絕大大大部分香港人的心聲。但唔好以為首歌只係唱出hea的一面，中間個句「搵出個意義做人唔容易」先係精髓。現實就係咁無奈，搵出人生意義真係一Ｄ都唔容易呀！－－開工喇，大家！努力！
歌詞：http://hk.music.yahoo.com/album-song.html?songid=74133

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

下星期就過年了～第８周「每日一歌」選了兩首應節的過年歌來跟大家拜個早年！恭喜～恭喜～另外三首就係中文既動畫歌曲，無論你係老餅如我，或是年輕的九十後，至少都識一首吧！

16/01/2012 MON
《高智能方程式》草蜢 - 你讓我找到未來

上上星期草蜢係勁歌頒獎典禮唱左首勁old school既 〈一起衝〉 ，令人諗地佢地唱既《高智能方程式》主題曲：原來首歌叫〈你讓我找到未來〉，我一直以為就係叫「高智能方程式」！呢ｄ真係童年回憶，唔駛音樂唔駛歌詞都識唱！搵唔到《高智能方程式》既中文opening，得草蜢的無線MV版，又係另一種風味！

17/01/2012 TUE
《數碼暴龍》鄭伊健 - 自動勝利Let's Fight

尋日的《高智能方程式》曲、詞都係本地原創，但90年代中開始，大部分動畫主題曲係用返原曲再填中文詞。好多動畫迷唔鍾意無線呢個做法，亦都嘈左多好年。在我自己，都有好聽的例外，例如第一輯《數碼暴龍》既主題曲，我會聽到眼濕濕！！「遇怪魔我即刻變大個～～」（想當年，我好鍾意扮亞古獸把聲的，宜家已經扮唔返喇～）

18/01/2012 WED
《百變小櫻magic卡》曾嘉莉 - 百變小櫻magic卡

二不離三，再聽多首女仔既動畫歌。《百變小櫻magic卡》呢首直情好聽，詞都填得唔錯，同個故事都match。（不個主唱的曾嘉莉已經消失左。）雖然好多人唔鍾意無線改動畫歌，其實我地細個聽既，不論係新曲新詞定原曲新詞，都係無線自己作的中文版，我地宜家聽返都覺得好正、好有童年回憶。我成日諗，或者宜家ｄ細路大個之後，都會鍾意無線個ｄ中文版動畫歌呢？Who knows?

19/01/2012 THU
TWINS & BOYZ - 四囍臨門喜迎春

今日已經係年廿六！大家執左屋未？買左新衫過年未？差唔多時間要準備一下喇！我嫌今年無乜過年氣氛，拿拿臨聽返首賀年medley，炒熱一下！英皇宜家每年都會出群星翻唱賀年歌（其實宜家個ｄ唔可以叫星），04年Twins + Boyz呢首好似係第一年。可能個期唱K成日唱，竟然覺得呢首OK好玩，尤其係第一句「齊齊來～」，我會特登走音，唱「齊4齊2來6」，好好笑！

20/01/2012 FRI
《東成西就》張國榮、梁家輝 - 雙飛燕

貼埋今日，「每日一歌」收爐了～唔想揀聽到厭既賀年歌，不如就睇下經典賀歲片！「菩提老祖」劉鎮偉既《東成西就》，夢幻卡士：張國榮、林青霞、梁家輝、張學友、梁朝偉、王祖賢……無周星馳一樣咁瘋狂抵死無厘頭！！（宜家ｄ賀歲片同以前無得揮！）呢一段梁家輝為左令張國榮講出「我愛你」，就假扮三公主……請留意佢個頭，個一支支既髻不斷轉款！愈轉愈瘋狂！～（又，劉鎮偉套《西遊記》入面既「菩提老祖」，咪就係劉鎮偉本人囉～）

好喇，在此向大家拜個早年，祝大家龍年如魚得水，心想事成！年初四「每日一歌」啟市呀～到時見！

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！

今個星期「每日一歌」談談不同形式的Punk！有美國的Punk、英國的Punk、憤怒的、絕望的、好玩的、情緒化的……Punk的變化和形式可真多著！

09/01/2012 MON
Sex Pistols - Problem

放浪形駭是有原因的這是出於對現實社會和政府的憤怒。要數反政府反建制，怎能不聽Sex Pistols？理念上，Sex Pistols的朋克極高姿態，God Save The Queen、Anarchy in the U.K.，把英國政府噴得一面屁。憤怒的力量訴諸形式，便成了破壞力，如他們的形象，也如音樂上的簡短急速和章節重複。Sex Pistols除了上面兩首經典，今天選的Problem，也是憤怒地把一無是處的人數罵一番。請知道，Punk不是把頭髮Gel到一支支、穿環、窩釘、皮褲而已。（要說Punk Fashion Scene也不是不可，當然，那自然是另一篇長文。然後，又必須由Vivienne Westwood說起。）

10/01/2012 TUE
Joy Division - She's Lost Control

Sex Pistols是Punk的憤怒，Joy Division的Post-punk就是絕對的失望，連憤怒的力氣都沒有。Punk的分支和變化極多， Post-punk就變得內向和實驗。Joy Division的壓抑風格，與主音Ian Curtis的抑鬱和癲癇病有很大的關係。據聞Ian Curtis看到一女子癲癇發作而寫了這首She's Lost Control，諷刺的是，然後他本人確診患上同一個病。最後抵不過疾病和抑鬱，上吊自盡，只有23歲。

11/01/2012 WED
Ramones - Havana Affair

美國最早的Punk大宗，非Ramones莫屬（比Sex Pistols還要早）。回說音樂風格，有話「只要懂得三個和弦便是Punk」，雖然誇張，但錯唔晒。Ramones簡明快速、直接明亮，爽快又率直。Ramones不像Sex Pistols的爆炸式憤怒，他們是好玩和快樂的。即使有關政治事件的歌，一樣輕快搶耳，例如今日的Havana Affair。Ramones的影響足足二十年有多，後來的Punk Band、Metal Band，許多都直認是受到Ramones啟發。明天舉例再說。

12/01/2012 THU
Green Day - Minority

時間一跳，聽聽今日的Punk Band。早年的Green Day一樣簡短輕快（甚或更快，大抵是因為主音Billie Joe有點過度活躍）。簡明的三和弦，可謂從Ramones一脈相承。說Green Day，許多人只識Wake Me Up When September Ends和21 Guns，其實在他們第二次大紅之前，即是最低潮時期，就有這樣的一首Minority大叫著反主流：「I want to be the minority, I don't need your authority」。請留意歌詞。（選這個Live version，不是這個版本特別精彩，而是YouTube上的MV版大部分都把歌詞中的「Fuck」全都mute走！無晒神髓！我至憎！！）
中英歌詞：http://tw.knowledge.yahoo.com/question/question?qid=1608050711627

13/01/2012 FRI
My Chemical Romance - Famous Last Words

星期五，以Emo-punk收結。Emo一語來自Emotion，情緒化的Hardcore Punk。雖然My Chemical Romance一直否認，但外界一致地將他們歸類為Emo。我覺得MCR Emo與否，佢地都有Punk的特質（強勁的結他和節拍感）。今日係黑色星期五，就係佢地前張大碟The Black Parade揀歌：呢個Famous Last Words既Live好精彩，主音Gerard Way狂放演出（次次睇佢Live都有ｄ驚佢唱到氣絕），Ray Toro同Frank Iero兩支結他齊齊爆發，睇到流左一身汗咁淋漓盡致！

＝＝＝＝＝＝＝＝＝＝＝＝＝＝＝＝＝＝＝＝＝＝

上面只選５首，當然是鳳毛麟角，是Punk的某些角度的反映。然而，不論風格變化，Punk的核心精神大抵不離其宗：顛覆、叛逆、反抗建制、強調自我。Sex Pistols的無政府主義和Green Day（尤其是American Idiot）對政府的不滿是顯而見的。至於Joy Division和My Chemical Romance，就較為個人，Joy Division的內向更是沉重得叫人不安。表面上，Ramones看似沒有這些樂隊的深刻內容或「主義式」的前提，但Ramones的出現，本身已是一場革命式的改變。他們簡單快速直接，正正是對70年代那些冗長的流行音樂的顛覆。說Ramones是Punk的始祖，一定錯不了（特別是美式Punk）。

最近在聽一張Ramones的Tribute大碟：We're a Happy Family: A Tribute to the Ramones。參與單位星光熠熠：Red Hot Chili Peppers、Eddie Vedder (Pearl Jam)、Metallica、U2、Kiss、Marilyn Manson、Garbage、Green Day、The Pretenders、The Offspring……各樂隊出盡渾身解數，用自家特色重新演繹舊歌，各自精彩而互不搶鏡，百花齊放，大力推介！

（想重溫過往的「每日一歌」？按這個「1song1day」tag便OK了～請多多支持啊！）

上次講了音樂，今次談談電影。這篇就是2011年個人電影回顧了。

Statistics
先來一些數字。2011年看電影也不少，全年進戲院看戲66場，其中39場是電影節，另外27場是普通正場電影。

66套入面，多過一半，31套係動畫！一年入面點會有咁多動畫？大部分都是電影節看的！一年十二個月，除左一月、二月，其餘時間每個月都有大大小小的電影節！

最有趣的記錄係連續13個星期（三月頭至五月中），每個星期都會至少入戲院睇一套戲！好勁！

全年看過的港產片只有10套。2011年本地電影票房十大當中，看了《我愛香港開心萬歲》、《竊聽風雲2》、《新少林寺》、《最強囍事》、《關雲長》。

2011年非本地電影票房十大中，看了6套：《變形金剛：黑月降臨》、《那些年，我們一起追的女孩》、《變種特攻：異能第一戰》、《特務戇 J之救國大業》、《猿人爭霸戰：猩凶革命》、《神探福爾摩斯：詭影遊戲》。

本來想說自己有幾支持港片，但對比往年，本地電影票房十大我係會睇八、九套的。希望明年可以看多些港產片，支持一下。

2011年終於的起心肝，每次看完電影節都寫筆記，一年最終完成目標，39場節目，共寫了24篇電影節筆記。（我要讚下自己！今次好有恆心！）始終，電影看完了，又怎樣？普通正場電影當娛樂，看完水過鴨背還可；但這麼堅持要追看電影節，在電影院花了個多小時，一切的感動和驚訝，最後也化為虛空，也太可惜了。所以我才決定要一一記下來，時間和金錢，才花得有意思。2012繼續努力，好習慣要繼續！（不論有沒有人看喇。）

2011年電影票房十大資料來源：
[講。鏟。片] 影協公佈全年票房十大

My Movie of the Year 2011
X-Men: First Class 變種特攻：異能第一戰

今年最興奮的觀影經驗，一定一定是X-Men: First Class。一來鍾意Superhero、二來鍾意動作片、三來個人喜歡Superhero crossover WWII的設定（像《Watchmen保衛奇俠》是我09年的Movie of Year，《美國隊長：復仇者先鋒》我也覺得很好看！）、四來自《Wanted殺神特工》，對James McAvoy好有好感，今次由佢擔正演年輕的Professor X，未入場睇劇照已經把我迷到一陣陣！

娛樂片而言，各方面都很平均地高水平：年輕演員們十分落力，演出了角色之間的活力與互動；故事既有輕鬆搞笑場口，情節同樣緊湊，特技未算頂級但也不錯。不過這都不足以讓我選為My Movie of Year。最後選了First Class，是因為看到中段，我已經完完全全投入電影當中，咬牙切齒；到最後沙灘決戰一場，我肉緊得握住拳頭在心裡大叫！好似真係有一下叫左「哎呀」出聲！

噢！Professor X，你真係好型！（雖然最後你大叫：「I can't feel my legs! (x3)」時我諗起《Scary Movie2》而笑左！解說：《Scary Movie2》條友明明本身係跛，其他人問佢有無事佢竟然大叫：「I can't feel my legs!」哈哈哈！！！）

另一套驚喜之作是《Real Steel鐵甲鋼拳》。本來完全無諗過入場，但某次看過Trailer之後，覺得挺熱血的，加上是機械人打鬥，也是我喜歡的類型，還有同事大力推介，決定入場一看。果然熱血感人，童星Dakota Goyo演出極之討喜，Hugh Jackman也沒有半點狼人的影子和包袱，還有我喜歡的Foo Fighters的新歌Miss The Misery作插曲！最終沒選上Real Steel，只因為我更喜歡James McAvoy！Real Steel差個馬鼻！

然後，《那些年》當然有個人的感動在其中，不過未到My Movie of Year的高度。《3 Idiots作死不離3兄弟》是好戲一早就知（三月電影節時已口碑載道），但片種問題，我還是很膚淺的喜歡動作打鬥漂亮畫面，看得愈興奮就愈喜歡。（所以難怪X-Men: First Class成了My Movie of Year。）

延伸：
[YouTube] X-Men: First Class 變種特攻：異能第一戰Trailer
[YouTube] Real Steel鐵甲鋼拳Trailer

「每日一歌」第６周～～～今個星期開始，如果該周「每日一歌」有特定主題，我會順道在文章標題點明，一目了然。2012年第一個星期的「每日一歌」，也響應一下今年的大熱主題：「未日論」！選了３首未日歌曲，氣氛、感情不一，咸魚青菜，各有所好喇～另加一首話題電影歌曲，看下去就知！

03/01/2012 TUE
Ping Pung - 二十世紀少年

2012，世界末日。我信，我仲想佢快ｄ到。確實，This city is dying，仲有咩值得留戀。我只求世界末日前有志氣地活下去。還是那句：無論信不信12月21日世界末日，做人也應該好好珍惜愛你的、你愛的人和事和物。請留意歌詞。
歌詞：http://ent.fightclub.com.pk/text/t-126012-p-1.html

04/01/2012 WED
許志安 - 愛你

繼續講末日。歌詞第一句：「世界末日到了麼，問我終結會如何」，經典得讓我選歌時完全忘了這首歌後半「死人冧樓都要同你一齊」的sweet得過分。以前會覺得，〈愛你〉有末日感：放大而安靜，副歌推向高潮。但今日再聽就覺得稍有所欠，氣場未夠廣闊宏偉，似係滿天星河多過世界末日。明天貼多首未日歌，再談。

05/01/2012 THU
EVA - Komm, süsser Tod（來吧，甜蜜的死亡）

Komm, süsser Tod，即「來吧，甜蜜的死亡」。首歌來自《新世紀福音戰士》舊劇場版，最後所有人消失，是為世界末日。這就是我想要的世界末日。不要經濟的世界末日，不是政治的世界末日，不要死得一半死唔晒的世界未日。像這首歌的氣氛，歡樂之至，歌詞卻消極到底。也像故事劇情，所有事物回歸虛無，華麗地、興奮地、快樂地終結，然後全新開始。不推倒現在腐朽的一切，世界不會有希望。（又，庵野秀明你條友，世界末日真係黎啦，仲有２集新劇場版你捨得出未？我唔想世界末日都未睇到大結局！！）
中英歌詞：http://blog.yam.com/sibasin/article/755347

06/01/2012 FRI
Led Zeppelin - Immigrant Song

Led Zeppelin的首本名曲應該是Stairway to Heaven，但我還是喜歡Immigrant Song的暴烈與張狂。主音Robert Plant一開口的尖聲「A~AH~A!!!」，配上壓抑的結他，有一種向內爆發的感覺。岩岩上既大衛芬查版《龍紋身的女孩》，trailer正係用左cover的Immigrant Song。（這個cover由Yeah Yeah Yeahs的主音Karen O同Nine Inch Nails的Trent Reznor主理。）

＝＝＝＝＝＝＝＝＝＝＝＝＝＝＝＝＝＝＝＝＝＝

想重溫過往的「每日一歌」？按這個「1song1day」tag便OK了～請多多支持啊！