好了！2011年電影節筆記最後一篇！！

ifva動畫作品十六年精選 節目二：「感動」16 Years of ifva Animation Programme 2
3/4/2011 12:30am @ agnes b cinema
點解會睇呢場，主要係想睇返好多已成名的本地漫畫／動畫家的當年作品。計有小克、伍尚豪、John Ho、Stella So，另外仲有一條《鰂公．緩步．狂想0700-0730》，當年參賽已經睇過，但真係太勁，一直想睇多次，今年終於有機會。感想不太多，略略一講。

小克的(#01)：1996年的作品，佢96年poly畢業，成15年前！亦都同佢宜家最廣為人識的「聾貓」風格好唔同，係比較科幻、黑暗的作品。（個種黑暗有少少似以前的智海。）

Stella的《好鬼棧》：Stella一炮成名作，對比起佢其他作品，當然有幼嫩之處（主要係講故事手法上），但動畫設計係最令人討喜的。善用九宮格出神入化的地步，係佢之後的作品已經唔多見了。（我記得，Stella講過，話要跳出呢個框框，唔可以限死自己，希望佢既創作不斷進步～！）

黃卓軒的《鰂公．緩步．狂想0700-0730》：一張畫紙，畫畫擦擦畫畫，擦到張紙爛完再補再畫再爛再補再畫，畫足一年去記錄30分鐘的事，Stop-motion黎講香港地一個人做到咁既效果，非常之厲害！所以先咁想再睇一次！我又好記得，當年Screening之後Q&A，黃卓軒話自己係讀建築的，呢幾年我心中都有個疑問，唔知佢宜家有無做animation呢？（之後睇過佢另一作品《北角身光之雜錦回憶》。）定係做返本行？（純八掛。）

放映作品清單：ifva動畫作品十六年精選 節目二：「感動」

＊　＊　＊

《夢中見》Surviving Life 3/4/2011 3:00pm @ 大會堂
今年真係睇左好多「真人動畫化」作品，呢套又係。電影的主題係「夢」，今次中文譯名比原名中point，英文原名反而係成件事的謎底。

先講拍攝技巧，除左大頭同近鏡，大部分人物動作、移動、場景、物件都係以拼貼手法處理。簡單而言，所有人物、物件就好似一張張相咁，放係背景相上面，再逐格拍攝的Stop-motion。呢種手法形成許多不合比例、不合透視的效果，同時更能表現夢中的超現實畫面。我初時想以「合理畫面」同「不合理畫面」去辨別主角在現實還是在夢中，好快，我發現是徒勞的，因為大部分時間都係「不合理」的！這亦令電影看起來處處充滿象徵意義和趣味。

不過，更大的吸引力係故事－－呢個係一個解謎故事。（含劇透～）平凡的男主角不斷夢見一紅衣女子，在夢中，他追求這紅衣女子，和她結婚……他擺脫不了這夢，甚至想繼續夢境，於是向心理醫生求救。男主角就和心理醫生，一步一步解開這夢的謎底。謎底當然不在這裡說，只能說，挺悲傷的。

男主角透過解夢重新面對自己的潛意識和童年陰影，印證了弗洛依德的解夢說。喜歡這主題自然覺得電影頭頭是道。弗洛依德在《夢的解析》這樣說過：

「每個夢都顯示一種心理結構，充滿了意義，並且與清醒狀態時精神活動的特定部位有所聯繫。然後，我將盡力闡明夢所隱藏的奇異與曖昧，並由此推斷這些衝突或吻合的精神力量，正是形成我們的夢的原因。」

我是那種昨晚夢見什麼人什麼事也記得一清二楚的人，這電影再一次提醒我，我每晚夢見的，那個才是「自己」。

[YouTube] Surviving Life (Theory and Practice) Trailer
延伸閱讀：[簡] 夢的解析線上閱讀

《小熊曲奇大冒險》Kooky 2/4/2011 2:45pm @ The Grand Cinema
有點像Toy Story2的故事，但《小熊曲奇大冒險》的亮點絕不一樣－－是捷克動畫最拿手的布偶和電影的主題。

先講動畫。入場前一直以為是Stop-motion，一開場就知唔係，ｄ公仔的動作太流暢了！果然！係提線布偶！Stop-motion應該好少，更多是live action。呢方面對我黎講，相對地係無咁吸引（純粹個人喜好）。不過，客觀地說，布偶動作做得好出色，例如凌空打斛斗、扭乾自己等等，更出色係有少部分情節係布偶和動物的對手戲，連動物都夾到咁match，呢點確係好好睇。另外，因為大部分鏡頭都係小布偶的線點，佢地既遠景會好蒙，加上唔少手提鏡，我又睇到嘔。（出場之後我真嘔！）

（以下含劇透。）故事大設定好似Toy Story2，玩具熊曲奇比媽媽掉左，佢要搵路返屋企。但發展出黎係森林的權力鬥爭，結局又隱含生命交替的深意。片中小主角同玩具熊曲奇，流浪漢伯伯同森林守護神Captain Goddamn，各搵左同一個演員配音，到結局小主角將玩具熊曲奇交比快死的流浪漢伯伯，伯伯死後，曲奇再一次返到去森林，同Captain Goddamn守護森林的和平，這樣的處理有驚喜之餘更令人動容。導演編劇不是安排曲奇順利返到屋企就算，而係要佢再次返去森林，當中Captain Goddamn同曲奇的情誼固然感動我，其次係小主人同小玩具各自的成長，生命的輪迴，仲有帶出果份正義在心中的淡淡溫暖，叫人覺得呢套動畫有深度得多。呢一點同迪士尼的熱鬧式合家歡好唔同。

《小熊曲奇大冒險》（內地譯名《玩具熊回家路》）豆瓣簡介
[YouTube] Kooky - English ver. Trailer
[facebook] Kooky movie（facebook上有更多production still）

＊　＊　＊

《愛瘋三次元》Milocrorze - A Love Story 2/4/2011 9:50pm @ 文化中心
山田孝之！鍾意山田孝之去到一個地步，只要見到佢滿面鬍鬚、頭髮勁長癡立立、成個「麻原彰晃」咁係大銀幕出現就會心底尖叫！大愛懶達達造型的山田孝之！靚仔小生唔岩你啦～快點變成大叔吧！！（發癲完～）

入正題，其實呢套都幾係十足期望，一來山田孝之，二來導演係石橋義正！即係《新富康家庭》的導演！睇過《新富康家庭》，就知道導演的瘋狂風格，看這類電影，千萬不要用正常頭腦思考，好好享受豐富的畫面、激昂的配樂、精心設計的笑點和惡搞吧～

含劇透講講：３段各不相關的故事，山田孝之一人分飾三角。

１）小男孩愛上女神，前半完全是童話式的，後半三十年後，小男孩長大（山田孝之）再遇女神，氣氛同前半好唔同，多少少寫實。完場Q&A有人問點解女神三十年來無老過，其實最後一幕女神閂門時係睇得出老左。之前加晒柔鏡，係男孩的主觀鏡先顯得女神無老。所以導演叫提問者再睇多次套戲，回得係串，但串得應份。

２）愛情教授的愛情急救電話，專教宅男如何突破愛情樽頸。山田孝之飾演的教授造型已經夠誇張，仲要勁惡、勁浮誇地同２條女係咁跳住舞出場，這部分笑位特多，夠瘋狂～賣飛佛。

３）浪人尋找被擄愛人的故事。這部分相對較長，結構也複雜些，穿越時空。山田孝之遇上真命天女，先展開一番落力追求，追到之後愛人又被人擄走。二人相識於現代，尋找的過程漸漸轉去古代，導演用左一個橫向的長鏡頭去表現時空的轉變，交代浪人幾年間的經歷，做法聰明又好睇。第二個精彩位係浪人大戰妓院流氓，都係一個橫向的長鏡頭，但加入大量slow-motion，動作設計也不遜色，敵方人馬不斷湧上，一浪接一浪，要計算得很準先做到一take過。

雖說三段故事各不相干，但主題共通，就是對愛情的追求。其實都做得好白，無論用咩方式，係咩時空，人都係一樣會追求、尋找屬於自己的愛情。所以導演話，呢套電影係「一個5D的愛情故事」，一語中的，講晒。

＊套戲太新了！搵唔到Trailer！大家睇住劇照先吧～～～左：獨眼浪人，右上：愛上女神的男孩長大成人後完全無變過，山田孝之一做呢類自閉仔角色又變返當年的電車男；右下：勁wild的愛情信箱教授，大家睇下佢個肥肚腩！！唔好以為著到全白就見唔到～～

《復仇三chok俠》Bunraku 31/3/2011 9:30pm @ 朗豪坊UA

美漫、牛仔、日本武士、animation、惡搞、動作、暴力、B片格局、cult、熱血、男人既浪漫……將我最鍾意既野集合於一身，點可能唔好睇？美術一流，賞心悅目，開場的剪影動畫，間場的美漫，仲有模擬Stop-motion模型的粗線條場景，係「動畫化」呢個美術層面做得好靚。（又係我好想講果個「真人電影動畫化」既topic！！）

反差既設定又係好有趣。08年三池崇史的《日式牛仔一品鍋》玩既，係將日本文化放係西部環境，一班日本演員扮牛仔、講英文，仲有昆頓塔倫天奴客串，真係由頭笑到落尾。今次導演佳摩殊玩既都有ｄ似，成班西人，大佬住既城堡成座大阪城咁；加上第二男主角Gackt的插入，係西部場景放左個突兀既日本人，出黎既反差無論係故事上定美術上，都有好大火花。呢方面我好同意電影節官方簡介咁講，「導演佳摩殊踏出昆頓塔倫天奴的步法」，一脈相承。不過，昆頓塔倫天奴當然更勝一籌，就是同三池崇史的《日式牛仔一品鍋》比較，我都覺得《日式牛仔一品鍋》稍稍精彩一點。《日式牛仔一品鍋》係故事上的轉折較複雜，擺出結局的時候真心動容；而《復仇三chok俠》就較俗套。俗套唔係唔好，呢類片千萬一定要俗套，咁先似B片格局同惡搞到盡。不過，如果能跳出俗套的框框，就會好有驚喜。

另外要特別講講，套戲係唔少地方惡搞spider-man，劇情方面就唔透露了，但至少都要講，片末出credit，首BGM係spider-man theme song！！唔知同場有幾多人留意到？

＊左：Josh Hartnett，即係當年《珍珠港》除左Ben Affleck，另外果個男主角呀！當年明明係個死靚仔，而家成個man晒！（噢，賣飛佛～）右：Gackt既演出完全收貨，英文也說得不錯。

所以，鍾意Kill Bill、《日式牛仔一品鍋》，睇開美漫（尤其spider-man），一定睇到好多用心良苦的設定同笑點。同埋要一提，套戲的女角－－Demi Moore！係老左好多，但好搶戲！

最後又要鬧下電影節大會，什麼「三chok俠」，第一，男主得２個，Josh Hartnett 同Gackt，酒保係重要，但唔算係「三俠」。第二，係唔係呢期興咩潮語就一定要用黎做戲名？電影節改個ｄ中文名一向都好差，又一例證。

《復仇三chok俠》（內地譯《人形淨琉璃》）：豆瓣簡介
（Bunraku係日文「文樂」咁解，即係人形公仔布袋戲）
[YouTube] Bunraku Trailer

《幻象師》The Illusionist
29/3/2011 7:15pm @ 文化中心
施梵素美，《瘋狂約會美麗都》個導演。畫面質素完全唔需要擔心，所以唔多講。講下個故事，真人真事改編（含劇透）：時代變遷，無人再相信魔術。一個好好先生既老魔術師，一次到鄉下表演，遇到個仲相信魔術的女仔，個女仔就跟左魔術師返城市。

唔知話個女仔天真，定無知，定弱智，信有魔術唔係問題，但佢跟住魔術師之後就好似老馮咁，想要咩就問魔術師要，魔術師竟然仲好人到努力做野，甚至做雜工搵錢去滿足個女仔。一個屈尾十，個女仔識左個後生仔，就跟左人走。難為老好人留低一句「magician does not exist」，就成全佢地一個人離開。

呢個故事未免太現實、太悲哀了！我真係消化唔到老好人同個女仔之間的感情，係親情？友情？愛情？互相依賴？（我覺得只係個女仔依賴魔術師。）亦都唔明白點解個女仔可以變得咁快。魔術師愈對個女仔好，愈令人覺得個女仔討厭。作為觀眾，代入唔到劇中人或劇中感情，太抽身咁睇，睇完真係好心up。

《幻象師》：豆瓣簡介
[YouTube] 《幻象師》Trailer

＊　＊　＊

《世界動畫精選（二）》World Animation 2
29/3/2011 9:45pm @ 科學館
今次有７條片，又講下其中幾個作品，部分含劇透。（Click片名可看Trailer或全片。）

The Eagleman Stag：用發泡膠造的全白Stop-motion，發泡膠的特質令到ｄ模型好似識生長。每拍一格就cut一cut發泡膠，再playback，就會睇到ｄ發泡膠生長。最驚喜係最後一鏡，模型公仔變返做發泡膠，Stop-motion都可以做到咁凌厲既效果，正。

The External World：之前已經睇過呢位導演David O'Reilly既作品Please Say Something，雖然兩次都係有少少不明所以，但個人風格強烈，我個人好喜歡。今次的瘋狂去到極致，通常ｄ咁有style，咁瘋狂，又爆笑的短片，無乜故事都唔緊要，玩得夠癲已經好好睇。

Something Left, Something Taken：故事完整有趣，一對年輕夫婦疑神疑鬼以為被綁架的喜劇。場景、人物、各樣，應該都係先做模型，再用電腦（後期）令佢地郁。雖然無左Stop-motion的效果，但「失真」同「迫真」都一樣係動畫的趣味。（呢個又係我成日講既：動畫求迫真vs真人電影動畫化。）

《泡芙小姐的金魚缸》：優酷贊助的內地出品。動畫人物加真實場景，一開始時幾驚喜，再睇落去就覺得係特登，就係要真實感。技術黎講，我收貨的。可能係內地作品，降低左要求。但部分情節依然俗套，似乎內地作品總係走唔出自己的創意。後半開始陳套（不論劇情同畫面處理），裸露場面也太多，某程度上令到套片庸俗左。呢個係導演問題，要表達同樣訊息，可以做得含蓄ｄ、有味道ｄ。

《泡芙小姐的金魚缸》：豆瓣簡介

《冬之日》Winter Days 26/3/2011 7:45pm @ 太空館
《冬之日》係日本人偶動畫大師川本喜八郎（1925-2010）邀請35個動畫家，例如高畑勲同歐洲出名的動畫家，將松尾芭蕉同朋友（定徒弟？）一同創作的的「連句」《冬之日》動畫化。簡單講，「連句」就係接龍，套動畫都用同樣的形式，一人負責一句詩，接力創作。

大師真係大師，川本喜八郎既人偶Stop-motion好smooth、好自然。其他人既就比較參差，不過不失令人眼前一亮之作。可能係古詩加上日文語言不通，睇英文字幕其實唔太領會到首詩的優美，（之前睇過芭蕉翁中譯既詩都ｏｋ的。）如果淨睇片，就會覺得部分片同片之間有ｄ疏離。不過唔緊要，呢個都係接龍創作的一種趣味。另外，因為係古詩改編，都預左節奏慢，但每次都要讀左首詩，先再去片個下令到節奏更慢，更眼訓。反而成套戲後半個making-of好好睇，我隔離個阿叔making-of全訓，我就醒晒。

BTW，川本喜八郎既Stop-motion真係好吸引，其實都有少少想睇埋佢其他作品。不過我又有ｄ怕日式白面娃娃（好靈異！），所以放棄左佢既遺作《死者之書》。

《冬之日》：豆瓣簡介
[YouTube]《冬之日》Clip 1~36
[YouTube]《冬之日》Clip 2 (By 川本喜八郎)

＊　＊　＊

《刺痛我》Piercing I 28/3/2011 7:15pm @ agnes b cinema
上星期已經見到有朋友在facebook說唔得，做足心理（及生理，即係會訓著）的準備入場。還是那句，沒期望沒失望兼無訓過。但講真，作為一套動畫，可以話只有10%係「動」畫，其餘係定鏡。如果係短片，仲可以接受；但長片就真係求其左ｄ。不過，我幾鍾意呢種畫風同色tone，寫實場景不失原畫師的個人再創造，人物又夠樣衰似足古谷實筆下人物。（今次電影節官方簡介寫得好準確。）齋睇一幅幅畫，其實ｏｋ－－所以我諗，如果呢個係漫畫作品，會好好多。（其實咁都幾弊。）

而個故事，雖然有俗套的一面，但講中國問題，好真實。公安私刑、商家貪污、失業、城鄉問題、金融海嘯，連中美關係都有一句講過。係呢方面，加返少少分。（但真係好少，因為套戲真係唔係點「動」過！）BTW，全套戲最令我激動的一幕，係主角屋企，貼左張Nirvana既poster！導演有taste！

《刺痛我》：豆瓣簡介
[YouKu] 《刺痛我》Trailer

《世界動畫精選（一）》World Animation 1
26/3/2011 10:30am @ 科學館
今次有8條片，又揀幾條講講。（Click片名可看Trailer或試片。）

Bill Plympton今年又有兩套（佢好似係呢幾年電影節常客）。Guard Dog Global Jam：睇過Plympton原版的Guard Dog，就覺得今次的Global Jam好正。顧名思義，Plympton公開邀請世界各地的動畫師投稿，一人幾秒重新remake佢既舊作Guard Dog。Stop-motion、CGI、剪影、塗鴉……各種風格技術出到盡。

另一套Bill Plympton的The Cow Who Wanted to be a Hamburger：今次無用佢最拿手的手繪，改用電腦畫同上色，雖然仍然係2D，但就少左手繪筆跡，總覺得無咁好睇。（雖然Bill Plympton睇得幾多，但其實我麻麻地佢既長片，短片行幽默路線就好ｄ。）

Stanley Pickle：真人扮Stop-motion模型，睇的時候不斷諗：「點解要用真人去扮模型做motion？」呢個同「真人電影卡通化」係一個有點似的問題，要講又可以係一篇論文……講返條片，真人扮Stop-motion，係有原因的，同劇情有關，所以出黎效果好match同有意思。呢ｄ就係用得其所。
講多少少，第13屆ifva動畫組有條片叫《音揚．陰陽》，入唔到圍，但有特別放映。個故事好有趣，拍出黎亦不錯，但唔知係唔係太多真人，唔夠animated，所以入唔到圍。忽發奇想，如果呢套Stanley Pickle係ifva動畫組，唔知會點呢？

The Greatness：除左手搖鏡，其實我幾怕呢類「靈異畫面+壓迫力強既音效」，睇得好辛苦。（個人問題。）

《奇廟單車遊》：本地作品，rthk外判動畫。可能係本地作，本身不算很特別的故事也變得十分有共鳴，竟然睇到喊。講一個小妹妹由踩「輔助轆」到「兩個轆」cross-over奇幻歷險的成長故事。

＊　＊　＊

《豆富小僧(3D)》Little Ghostly Adventures of the Tofu Boy (3D)
26/3/2011 4:00pm @ The Grand Cinema
OMG，睇到訓著。套戲個半鐘，睇左頭尾30分鐘，中間30分鐘勁釣魚。點解會咁？首先，3D做得麻麻，係開頭好ｄ。偏暗的問題幾嚴重，應該唔係戲院的問題，之前係The Grand都睇過3D，沒問題的。第二，一個妖怪故事，30分鐘後主角入左人類城市，但ｄ人類既design實在太差了！！主角群角色都可以做到online game咁既質素（大概係跑online的水平），連電視動畫都好過佢！又根據電影節官方簡介，如果真係「日本首部3D立體大製作」，咁，日本特技真係仲差好遠。（明明上次睇《宇宙戰艦大和號》我覺得好ok的。）仲有，所謂「傳統細緻畫風加上立體效果」，結果兩頭唔到岸，上場《戀戀節拍夏灣拿》都畫得仲好。之於故仔，好正路個類幼兒卡通。（呢層我無乜批評，可能係畫得太差，已經無理個故事。）

《豆富小僧》：豆瓣簡介／View Trailer

今日睇既係安錫國際動畫影展近呢兩年的佳作。總共10條片，講講幾中幾個作品。（Click片名可看Trailer或全片。）

歐洲動畫作品選：安錫佳作
23/3/2011 7:30pm @ agnes b cinema

Madagascar, carnet de voyage（馬達加斯加：旅行日記）：舊年法國電影節睇過，當時真係睇到目定口呆，實在太靚了！油畫、水墨、素描、木顏色……用3D技術呈現各種2D畫風，就好似睇緊「會郁兼立體」的2D畫！有層次、有景深、風格又多，仲會郁個下先勁！更厲害係，中間仲要插入2個Stop-motion，一個係模型車，另一個係用衣車針黹，車左好多幅畫，再串埋的Stop-motion！！（Trailer中的0:33，未免太誇張了！）條片係岩岩果屆奧斯卡提名最佳動畫短片，但最後輸左，幾可惜。可能因為太似旅遊宣傳片，無乜故事。另外今日睇呢個版本無左個end credit，上次睇個end credit係有班製作人員真人同少少making-of的，又一可惜。

L'homme à la Gordini (The Man in the Blue Gordini)：哈哈哈！呢個係一個藍色大戰橙色的瘋狂、幽默故事！我最鍾意既橙色做奸，最唔鍾意既藍色做忠！正！！

Love & Theft：不斷變化的圖形中，出現一個又一個熟悉的卡通人物，hello咪咪、海綿寶寶、芝麻街、飛天小女警……扭曲拼合再循環……音樂、節拍好match。

Je te pardonne (I Forgive You)：Simpson風格抵死動畫，大隻佬摔角手不打不相識，唔係，不打不相愛先岩。（爆！）

Sinna mann (Angry Man)：講家庭暴力問題的動畫，睇完既心up，又不安。

放映作品清單及簡介：
[英] 歐洲動畫作品選：安錫佳作

 ＊　＊　＊

今年既ifva去到呢度告一段落～之後仲有電影節筆記繼續上場！！

xanga中文標題有字數限制，唯有用英文……（其實我覺得電影節好多戲的中文譯名都改到不倫不類，用返英文原名都好既。）

今年電影節會睇13套，依然動畫為主，日本片為次，其中有一套3D。好喇，年度大作之電影節筆記第一擊，去文！（少量劇透注意！）

《貓的一生》A Cat in Paris 22/3/2011 7:15pm @ 會展
好精彩！作為今年電影節第一套，係一個非常好的開始！中文譯名譯到好似《子貓物語》懶可愛，其實係一個非常緊張刺激的「警捉賊捉賊」的故事！集可愛、邪惡、聰明於一身既貓係賊，但係忠既～講返技巧，2D動畫，繪本風格，全人手上色，淨係呢點已經好好睇（賣飛佛）！導演話，套戲香港未搵到發行，希望有機會上正場。但對於呢類人物角色唔夠搶眼突出的動畫，係香港係唔會有market的。因為角色做唔到玩具，少左條財路，少左noise，少左個勢，係香港幾乎可以話係無市場。（再講落去有排講，有時間先講下迪士尼、DreamWorks既商業動畫係點賺錢。）

《貓的一生》：豆瓣簡介／View Trailer

《戀戀節拍夏灣拿》Chico & Rita 22/3/2011 9:45pm @ 會展
喜歡南美風情Jazz的，一定喜歡這套動畫。雖然我個人麻麻Jazz同Bossa Nova，但聽得出亦睇得出音樂同套戲異常配合。無他，因為套戲正係講鋼琴師同歌手的故事。以50年代的古巴、紐約做背景，帶點懷舊的異國風情。至於劇情，很典型的愛情錯摸……結局跳得好快，還算感人。電影節官方簡介話套戲2D同3D「轉換渾然如行雲流水」，呢一點我真係不敢苟同，撰稿的朋友要睇睇《Flatwold》先好寫呢句。（應該仲有好多例子，不過我心目中《Flatwold》最amazing。）其實主要係場景、大廈、物件用3D先做model，再用2D加返細節；而人物就應該係2D畫的。

《戀戀節拍夏灣拿》：豆瓣簡介／View Trailer

今天一口氣看了41條動畫短片，好多！

Eric Riewer動畫講座及法國GOBELINS動畫選集一
20/3/2011 1:30pm @ agnes b cinema

主講的Eric Riewer是法國著名動畫學校GOBELINES導師。GOBELINES的學生，大都進了PIXAR、DreamWorks這些動畫大廠，絕對堅料。

唔知醒遲到關係，講座只聽到後半。我一入場，Eric Riewer在講GOBELINES三年制的各級功課。Year 1做的是很簡單的短片，不需要很高技巧，要求學生做好story telling。Year 2學生會五人一組，合作做一條約30秒至1分鐘的動畫trailer。Year 3學生可以選自己喜歡的技巧，2D或3D或mix，用半年時間做一條約3分鐘的畢業片。

Eric Riewer一路講，一路有demonstration睇，仲有幾條making-of。個講座其實幾好睇、幾好聽。Eric Riewer最後總結左幾個point比大家：

1. Time Management：Eric Riewer強調左幾次，學校比你半年時間做畢業片，所有野都一定要半年時間完成。所以佢地導師好大工作就係不斷要同學控制時間，趕deadline。
   　
2. Making-of：好多片都幾個人合作的，搵工時如何present自己的contribution？就要做一個自己既making-of，persent到你係條片入面負責做左咩。
   　
3. Keep it short：除左要控制製作時間，作品的時間都要好好控制。Eric Riewer話，你有幾高技巧都好，條片成10分鐘咁長，精彩野放晒係最後，觀眾同老世係無咁好耐性同你睇到尾的。所以有咩精彩野，要係頭2分鐘出晒；一條片約3分鐘就岩岩好，唔好太長。

＊　＊　＊

到Screening，雖然一口氣睇成29條片，但完全唔覺攰。可能真係每條片都好短，節奏快，易消化。其中《Oktapodi》，係09年奧斯卡的提名短片。當年已經睇過，今次再睇，Eric Riewer爆左單小花絮：原來當時唔夠時間，結果主角八爪魚由八隻腳變左六隻腳！09年睇的時候完全唔覺啊！！

推介大家看看其中兩個作品：
[YouTube] Oktapodi
[YouTube] For Sock’s Sake

放映作品清單：
[英] Selected Works of GOBELINS Programme 1

法國GOBELINS動畫選集二
20/3/2011 6:30pm @ agnes b cinema

部分短片因為比較長，加上本人太眼訓，實在頂唔住有一條放棄左……睇睇下訓著。再一次證實Eric Riewer所講，短小精悍自有其吸引力。

也推介大家看看其中兩個作品：
[YouTube] Jesus 2000
[YouTube] Fard (Trailer)

舊年在法國電影節已經看過《Fard》，條大橋幾驚喜。無獨有偶，兩個作品都係動畫加真人。前者是小趣味，後者直情係橋的一部分。

放映作品清單：
[英] Selected Works of GOBELINS Programme 2

去年的電影節筆記爛尾，今年由ifva開始，再次挑戰！為了減低爛尾的機率，我決定寫得簡短點，也不避口語，希望各位體諒，感謝！！

動畫組入圍作品放映
18/3/2011 7:15pm @ agnes b cinema

＊左上起，左至右：《The Launch》、《Corn》、《Back to Base》、《Aeriform Touch》、《Unroll》、《鞋子》、《Before the End》、《拾下拾下》、《學習雷鋒好榜樣》、《胡同鏡子》。同場加映：蘇敏怡作品《7-wishes》。

整體而言，今年水準很高！個人認為，原因有兩個：一，有兩套作品是已成名的動畫導演／漫畫家的作品，拉高整體水準；二，即使是學生畢業作，故事也很完整，節奏控制都不錯。特別講講其中幾個作品。以下純粹個人意見，如果導演們看到，請多多包涵。

《Corn》：甘荀大笑的動作很突出。粟米人走了很長的路先到大氣層，呢一節可以短少少。

《Back to Base》：一直有看本地獨立漫畫，早就聽過麥少峰、何家超的名字。故事剛開始有點不明所以，大概是綠色太空人高速飛行開始入局。動作流暢不在話下，最精彩不是海底的movement，是太空人被擊飛撞石那一下，好有《龍珠》FEEL！仲有，劉以達的音樂極醒神（點解可以搵到佢做音樂咁勁？好厲害！）

《Aeriform Touch》：離場後睇返場刊，才知道是丈夫思念亡妻而不斷畫畫。交待人物關係似乎未夠清晰。

《Unroll》：一開始各種顏色瀑布般瀉下，好醒神，是很好的開場。人物設計也很有個人風格。但還是那句，中後段逃跑一節略長。

《鞋子》：很感動！節奏控制得非常好。一如導演在Q&A時間所講，一條動畫，故事是很重要的。有了故事，第二步就是如何說故事。看了五年ifva，許多作品最大問題是控制節奏。音樂、配音這些問題都有方法避重就輕，但說故事的功力是很容易見底的。《鞋子》時間計算得很準，適當時間說適當對白，做適當畫面，三兩下手勢，就牽引著觀眾的情緒了。稍為拖沓都做不到現時的感人效果。

《拾下拾下》：一貫傅詠欣風格。可能是rthk外判項目，資源比較充裕，畫面比以往細緻多了。只是扮老人聲配音有點失色，如果找到老婆婆和伯伯配音，更有真實感和說服力。不知道同類題材是否看得太多，今次覺得不算很突出。當年看《啷神來聲》是很驚喜的，那個大嘴唇頭至今印象難忘。

《學習雷鋒好榜樣》：高登巴打一定識笑！

《胡同鏡子》：畫面異常凌厲，冷峻風格甚有韓國獨立動畫影子。

＊　＊　＊

放映過後，當然有心水。得獎名單在這裡。《鞋子》沒有特別表揚，有點可惜。其餘獎項雖不中亦不遠。

延伸閱讀：
第十六屆 ifva動畫組入圍作品
第十六屆 ifva得獎名單